Birasovddasvástádus

Meahciráđđehusa rolla stáhta eanan- ja čáhceguovlluid dikšun, geavaheaddjin ja suodjaleaddjin buktá ovddasvástádusa birrasis guovddáš oassin barggusteamet. Min mihttomearri lea gávdnat dássedeattu birrasa, servodaga ja ekonomiija gaskii, vai sáhttit ollašuhttit midjiide addojuvvon bargguid buoremus lági mielde čuovvumiin suvdilis ovdáneami prinsihpaid ja buoridemiin luonddu ja luondduriggodagaid dili stáhta eatnamiin.

Mii goahcat luonddujávkku stáhta eana- ja čáhceguovlluin aktiivvalaš doaibmabijuiguin, maiguin mii bajásdoallat ja lasihit luonddu girjáivuođa ja geahpedit nu unnin go vejolaš birrasii čuohcci vahátlaš váikkuhusaid. Dálkkádatprográmma bokte mii lasihit čitnanjieluid ja -vuorkkáid ja ođasmuvvi energiija buvttadeami ja geahpedit min nuoskkidemiid. Dasa lassin mii ovddidit dálkkádatrievdamii vuogáiduvvama nanosmahttimiin luonddu girjáivuođa ja ráhkkanemiin nuppástuvvi diliide iežamet doaimmas.

Birasáššit jođihuvvojit sertifiserejuvvon birasvuogádagain

Birasáššiid dikšun Meahciráđđehusas vuođđuduvvá sertifiserejuvvon ISO 14001 –birasvuogádahkii. Birasáššiin Meahciráđđehusa fitnodatdoaimma stivrejit láhkageatnegahtton Meahciráđđehussii ásahuvvon servodatlaš geatnegasvuođat. Dasa lassin máŋggaatnovuvddiid geavaheami stivrejit vuovdesertifiseren ja vuovdedoalu birasofelaš. Suodjalanguovlluid dikšuma ja geavaheami stivrejit lágaid ja láhkaásahusaid lassin suodjalanguovlluid dikšuma ja geavaheami prinsihpat.

Mii nannet luonddu girjáivuođa ja goahcat luonddujávkku

Girjáivuođabargomet váibmosis lea máŋggaid mihttomeriid oktiiheiveheapmi buorebut go dál. Mii dárkkodit doaimmasteamet luonddu girjáivuođa stáhta eatnamiid ja čáziid viiddes ollisvuohtan, mas luonddusuodjalanguovllut ovttas máŋggaatnovuvddiid ekologalaččat dehálamos luonddučuozáhagaiguin hábmejit olles riikka viidosaččat ekologalaš fierpmádaga. Fierpmádaga čuozáhagat leat šlájaid ja duovdagiid dáfus mihá dehálaččat riikamet luonddu girjáivuođa seailluheamis.

Luonddu girjáivuođa dorvvastit oppalaččat:

• Dikšumiin áitatvuložamos luonddutiippaid
• Dorvvastemiin máŋggaatnovuvddiid mávssolaš luonddučuozáhagaid ja lasihemiin mieskamuoraid
• Buoridemiin mearra- ja sáivačáziid dili
• Suodjalemiin áitatvuložamos šlájaid
• Buoridemiin guollečáziid ja fuođđoealliid eallinbirrasiid
• Ovddidemiin suodjalanguovlluid fierpmádaga

Mii ovddidit dálkkádatmihttomeriid

Mii ovddidit doaimmaideamet bokte Suoma mihttomeari leat čitnaneutrála jagi 2025 rádjái. Dálkkádatrievdama goahcan ja dasa vuogáiduvvan leat okta min strategiijalaš deattuhusain.

Meahciráđđehusa dálkkádatprográmmas 2025–2030 leat ásahuvvon mihttomearit ja meroštallon viidát doaibmabijut, maiguin mii nanosmahttit positiivvalaš dálkkádatváikkuhusaid, geahpedit negatiivvalaš váikkuhusaid ja ovddidit dálkkádatrievdamii vuogáiduvvama.

Min mihttomearri lea:

• Lasihit stáhta máŋggaatnovuvddiid čitnanjieluid 10 proseanttain jagi 2035 rádjái ja buot stáhta eatnamiid muoraid čitnavuorkkáid 10 proseanttain jagi 2030 rádjái jagi 2018 dási ektui.
• Ovddidit ođasmuvvi energiija buvttadanvejolašvuođaid stáhta guovlluin bieggafámu fidnoovdáneami bokte ja láigohemiin guovlluid ođasmuvvi energiija fitnuide.
• Geahpedit šaddiviessonuoskkidemiid 20 proseantta jagi 2030 rádjái jagi 2024 ektui. Dása figgat earret eará ovddidemiin háhkanproseassa, ávkkástaddamiin uhcán nuoskkideaddji mátkkoštanmolssaeavttuid ja oidimiin muoraid rádjan- ja fievrredanbálvalusaid háhkamis mašiinnaid,  mat nuoskkidit uhcán.
• Ovddidit luonddu vuogáiduvvama nuppástuvvi diliide earret eará aktiivvalaš luonddudikšun- ja luonddudillái máhcahandoaimmaiguin, šládjasuodjaleami ja caggamiin vahátlaš vierisšlájaid.
• Ráhkkanit nuppástuvvi dálkkádahkii iežamet doaimmas ovddidemiin doaibmamet ja ovdademiin dálkkádatrievdama váikkuhusaid earret eará suodjalanguovlluid dikšumis, vuovdedoalu hárjeheamis ja stáhta eatnamiid lávvemis.

ON:id suvdilis ovdáneami mihttomearit

Mii sáhttit doaimmaideamet bokte birasovddasvástádus-deattuhusain váikkuhit eandalii mihttomeriide 13: dálkkádatdagut, 14: čázevuloš eallin ja 15: eatnanlaš eallin.