Meahciráđđehus lea álggahan jagi 2020 guolleváriiddikšunmávssuid vuovdima. Guolleváriiddikšunmáksu lea bivnnuhis áhčiidbeaiveskeaŋka, go dat addá vuoigatvuođa guolástit duháhiin guollebáikkiid birra Suoma. Guolleváriiddikšunmáksu lodnojuvvo jahkásaččat measta ovcci miljon euro ovddas.
Guolástus ja luonddus lihkadeapmi lasihit buresbirgejumi. Lassin guolleváriiddikšunmávssuid čoggon ruđat mannet buori dárkkuhussii nappo guollečáziid, guolleváriid ja earret eará nuoraid guollebivdoáigeáji buorrin.
– Máŋgga bearrašis smihttet dál vuogas skeaŋkka áhččái, nuba háliidat álggahit guolleváriiddikšunmávssu vuovdima ja skábmamánus. Mii livččiige buoret skeaŋka guolásteaddji áhččái dahje áddjái go lohpi leat čázi alde dahje čáhcegáttis ja seammás buktit njálgga ja dearvvašlaš lagašbiepmu beavdái, dadjá fuođđodoallohoavda Jukka Bisi Meahciráđđehusas.
Suomas sulaid 1,5 miljon* olbmo almmuhit guolástit jahkásaččat. Dáin almmáiolbmot leat guoktá goalmmádasa. Dán joavkkus leat máŋga áhči ja ádjá.
Guolástusa leat gávnnahan buktit máŋggaid buresbirgejupmeváikkuhusaid, mat leat buot áhči oažžumis, go skáhppo sutnje guolleváriiddikšunmávssu áhčiidbeaiskeaŋkan. – Dalle ii leat eará go vuolgit uštit skihpáriiguin dahje šlivgut dolgevuokka mearragáddái, prošeaktaoaivámuš Mika Laakkonen Meahciráđđehusas ávžžuha.
Eana- ja meahccedoalloministeriija aiddo almmustahttán lustaáigge guolledoalu ovddidanstrategiija buktá ovdan guollebivddu mearkkašumi buresbirgejumi ja dearvvašvuođa ovddideaddjin ja bajida lustaáigge guollebivddu dehálašvuođa áhpásmuhttima, ilu ja eallámušaid geahččančiegas.
Jahkásaččat guolleváriiddikšunmávssuin čoggo guliid ja guollečáziid buorrin oktiibuot sulaid 9 miljon euro. Guolleváriiddikšunmávssuin čoggon ruđain ovddidat guollebivddu suvdilisvuođa, ruhtadit rávvenbálvalusaid ja guollebivddu bearráigeahču, oahpistat nuoraid vásttolaš guollebivdin, buoridat guliid eallinbirrasiid ja dahkat olu earáge guollečáziid dáfus dehálaš áššiid.
Dárbbašago áhčči guolleváriiddikšunmávssu?
Guolástanlága (79§) mielde juohkehaš 18–64 jahkásaš , guhte bivdá eará vugiin go oaggumiin, bilkemiin dahje sallitvuokkaiguin, galgá máksit guolleváriiddikšunmávssu. Jus áigu oaggut máŋggain stákkuin dahje bivdosiin, dárbbaša lassin čáhceguovllu eaiggáda lobi.
Guolleváriiddikšunmáksu olles kaleandarjahkái lea 45 euro, čieža jándorii 15 euro ja ovtta jándorii 6 euro. Guolleváriiddikšunmávssu jahkái 2020 sáhttá oastit Meahciráđđehusa Eräluvat.fi-neahttagávppis, bálvalannummiris 020 69 2424 dahje Meahciráđđehusa luondduguovddážiin ja R-kioskkain.
*) Luke statistihkka lustaáigge guollebivdiin 2016.
Loga lasi (suomagillii)
Lassidieđut:
Prošeaktaoaivámuš Mika Laakkonen, Meahciráđđehus, 040 5897559
Eana- ja meahccedoalloministeriija
Meahciráđđehus, Fuođđobálvalusat
Ealáhus-, johtalus- ja birasguovddážat
Luondduriggodatguovddáš
Suomen Vapaa-ajankalastajien Keskusjärjestö ry
Kalatalouden Keskusliitto
Suomen sisävesiammattikalastajien liitto ry
Suomen Ammattikalastajaliitto ry