Meahciráđđehus lea SuomiAreena váldoovttasbargoguoibmi jagi 2021 SuomiAreenas Poris. SuomiAreena ja Meahciráđđehus vuolláičálle soahpamuša váldoovttasbargoguoibmevuođas odne. SuomiAreena boahtte jagi temát leat searvvušvuohta, digitálalašvuohta ja luondu.
Meahciráđđehus gulahallanhoavda Terhi Koipijärvi dadjá, ahte SuomiAreena temát leat dehálačča maiddái Meahciráđđehusa viŋkilis. Ovttasbarggu dahket vejolažžan juhkkojuvvon árvvut dego máŋggajienalašvuohta ja dásseárvu, mat leat Meahciráđđehusa ođasmuvvi strategiija váibmosis.
”Min doaibma lea ovddidit vásttolaččat luonddu árvvu ja oktasaš opmodagamet badjel sohkabuolvvaid, ja das rabas servodatlaš ságastallan sierra oainnuid oktiiheiveheamis lea mearrideaddji dehálaš”, Koipijärvi dadjá.
Meahciráđđehus lahkona luonddu viidát. Mihttomearrin lea dorvvastit luonddu máŋggahámatvuođa, dahkat vejolašvuođaid suvdilis fitnodatdoibmii, lasihit eallinfámu ja ovddidit luonddus ožžojuvvon buresbirgejupmebálvalusaid. Seammás Meahciráđđehus vástida globála hástalusaide, dego dálkkádatrievdama goahcamii ja dasa vuogáiduvvamii.
SuomiAreena vástideaddji buvttadeaddji Johanna Tuuri mielde dál álgán ovttasbargu orru leamen buorre servodatlaš ságastallama dáfus.
”Meahciráđđehusas lea mearkkašahtti rolla suopmelaš servodagas báikkálaččat ja riikkaviidosaččatge ja maiddái Suomas dálkkádatmihttomeriid fáhtemis. Lea fiinna beassat dahkat boahtte geasi SuomiAreena ovttas, Tuuri dadjá.
Jagi 2021 SuomiAreena váldoovttasbargoguoibmin lea Meahciráđđehusa lassin maiddái teknologiija- ja mediafitnodat Telia.
Ohcan ordnejeaddjin geasi 2021 SuomiAreenai lea jođus borgemánu 2020 loahpa rádjai.
Lassidieđut:
Johanna Tuuri, vástideaddji buvttadeaddji, SuomiAreena, johanna.tuuri(a)mtv.fi
Terhi Koipijärvi, gulahallanhoavda, Meahciráđđehus, terhi.koipijarvi(a)metsa.fi
SuomiAreena lea Suoma stuorimus ságastallandáhpáhus. SuomiAreena árvvut leat rabasvuohta, máŋggajienalaš ságastallan, dásseárvu, roahkkatvuohta ja lotkesvuohta. SuomiAreena ordnejuvvo 15. geardde Poris 12.-16.7.2021. Temát leat searvvušvuohta, digitálalašvuohta ja luondu.