Almmustahtton 23.9.2021

Oljoliggemis luohpan unnida Bállás-Ylläsduoddara álbmotmeahci čitnajuolgeluotta 45 proseantta

Bállás-Ylläsduoddara álbmotmeahci bálvalan Duottar-Sámi luondduguovddáža ja Bállásjávrri fuolahanguovddážii leat stellejuvvon eanaliggenrusttegat. Teknihka dáfus ovdánan beaivvášpanelat stellejuvvojit báikái čakčamánus. Ovttastahttimiin liggenvugiid stuorra luondduguovddážis ja sierradálu dávistan fuolahanguovddážis oažžut dieđu eanet birasustitlaš liggenvugiid doaibmamis árktalaš diliin.

Duottar-Sámi luondduguovddáš ja Bállásjávrri fuolahanguovddáš leat ovdal liegganan oljjuin. Oljoliggemis luohpan oaivvilda jahkásaččat badjel 26 300 oljolihttera seastu. Lassin garvit oljju fievrredeamis ja vurkemis ja liggenvuogádaga táŋkkaid deavdimis šaddan birasriskka. Beaivvášpanelat stellejuvvojit Duottar-Sámi luondduguovddáža seaidnái ja Bállásjávrris fuolahanguovddáža gáhtu ala.

Eana- ja beaivvášliggemii sirdašuvvama mielde álbmotmeahci čitnajuolgeluodda unnu sulaid 70 tCO2e jagis. Meahciráđđehus ordne maiddái Bállásjávrri kánturlanjaid jagi loahpa rádjai ja luohpá oljoliggemis. Dat oaivvilda 12 800 oljolihttera lassegeahpádusa jahkásaččat, mii čitnajuolgeluoddan lea sulaid 34 tCO2e.

Álbmotmeahci čitnajuolgeluodda ovdal rievdadanbargguid lei 216 tCO2e jagis. Nuppástusbargguid mielde álbmotmeahci buot doaibmalanjat liegganit juogo eanaliggemiin, beaivvášenergiijain dahje ruoná šleađggain jagi 2021 loahpa rádjai ja álbmotmeahci čitnajuolgeluodda unnu 45 %.

Álbmotmeahci ja guovllu stuorra turismadoaibmiid Harriniva, Safartica, Levi Ski Resort, Čuoiganguovddáš Iso-Ylläsa, Cape Lapland ja Jouni gávppi čitnajuolgeluoddarehkenastimat sihke doaibmabidjo- ja investerenplánat leat ollašuhtton Tobe Low Carbon -fidnus. Tobe Low Carbon fidnu mihttomearrin lea dustet dálkkádatnuppástusa, seailluhit Bállás-Ylläsduoddara álbmotmeahcis mihtiduvvon máilmmi buhttáseamos áimmu boahttevaš sohkabuolvvaide ja dahkat ain birasustitlut turismabirrasa. Fitnodagain oassi lea jo sirdašuvvan ruoná šleđgii ja eará doaimmat čuvvot dan.

Tobe Low Carbon -fidnu (1.3.2019–31.12.2021) ruhtada Eurohpá uniovnna guovlluovddidanruhtaráju 364 740 € ja Meahciráđđehusa Luonddubálvalusat 120 686 € ossosiin. Guoibmefitnodagat oassálasten oktiibuot 23 700 € investeremiin. Bearráigeahčči virgeoapmahažžan doaibmá Davvebađaeatnama EBI-guovddáš.

Lassedieđut

Plánejeaddji Henri Arponen, Meahciráđđehus, Luonddubálvalusat, tel. 040 589 6554.