Gieddegeažis-bargobájis oahpásmuvvat Gieddegeaš-Gálgui, su ustibiidda ja eallimii earálágan luonddubirrasiin. Doppe čalbmes mánná sáhtii áicat čáhcerávgga, čahkalaggá, guliid, ealliid ja miellagiddevaš šattuid. Bargobájis mánát oahpásmuvve mytologiija lassin luonddus lihkadeapmái luonddu gudnejahttimiin. Helssega bargobájiin máidnasat ledje davvi- ja anárašgillii.

 

- Sámegielat luonddubajásgeassinbargobájiid mihttomearrin lea oahpahit ja movttiidahttit mánáid lundui ja addit rávvagiid das, mo luonddu galgá lihkadit luottaid guođekeahttá. Dasa lassin mihttomearrin lea oahpásmuhttit mánáid lundui gullevaš sániide. Guovttegielat bargobájiin mánát besset gullat iežas eatnigielas lassin maiddái nuppi sámegiela, muitala Meahciráđđehusa Luonddubálvalusaid spesiálaplánejeaddji Kirsi Ukkonen.

 

Pasila skuvla sámeluohká ovdaskuvla- ja vuosttas luohká oahppiin leat jo buorit vuođđodieđut luonddus johtimis, ealliin ja šattuin. – Čáhcerávga, guollebivdu, kánel ja čuoiggat ledje somát, mánát muitaledje bargobáji maŋŋá. Kánel sáhttá orrut amas dán joavkkus, muhto oktan bargun lei haksit kánela ja háisuoinni hájaid sullasašvuođa.

 

ON eamiálbmogiid gielaid jagi gudnin Meahciráđđehus lea ordnen dáid bargobájiid sámegielat árrabajásgeassin- ja ovdaoahpahusbáikkiin sierra guovlluin Suomas. Lassin árabut dán jagi leat ordnen bargobájiid maiddái Sámi oahpahusguovddáža sámegiela rávesolmmošoahppiide Anáris. Bargobádjeturnea joatkašuvvá maŋŋelis giđđat ja boahtte čavčča. Dán jagi ávvudat maiddái 160-jahkásaš Meahciráđđehusa ja luonddubajásgeassinbargobájit leat okta 160 suvdilis dagus luonddu ja servodaga ovdii. 

 

Bargobádji lea huksejuvvon Sámemusea ja Davvi-Sámi luondduguovddáš Siidda ovttas buvttadan Gieddegeažis mánáidčájáhusa vuođul, mii lei Siiddas 7.4.2017 –8.4.2018.

 

Spesiálaplánejeaddji Kirsi Ukkonen, Meahciráđđehus Luonddubálvalusat, 0400 479 986, kirsi.ukkonen(at)metsa.fi