Luonddusuodjaleapmi
Meahciráđđehusa luonddubálvalusat fuolahit stáhta eatnamiid luonddusuodjalan- ja meahccebálvalusain ja dain lea ovddasvástádus servodatlaš vánddardanbálvalusain. Suoma lágain mearriduvvon suodjalanguovlluin eatnasat leat Davvi-Suomas. Luonddubálvalusaid bargun lea fuolahit suodjalanguovlluin nu, ahte luonddu máŋggalágánvuohta ja áitatvuloš šlájat seilot boahtte buolvvaide.
Suoma stuorimus suodjalanguovllut
Davvi-Sámis leat Suoma stuorimus sierratiippat suodjalanguovllut: Geavu luonddumeahcci, Leammi álbmotmeahcci ja Sámmotjeakki – Vaddjogajeakki jekkiidsuodjalanguovlu. Davvi-Sámi luonddudikšunguovllus lea dehálaš rolla maid máŋggaid áitatvuloš šlájaid suodjaleamis. Davvi-Sámi njiččehasain earenoamáš áitatvuložin klassifiserejuvvoba njálla ja giljobaš (gálbbenjunčuonjá). Meahciráđđehusa váldegottálaš vástošlájain rievssatfálli ja njálla gávdnoba dušše Davvi-Sámi guovllus.
Kultuvrralaš ja sosiála bistevašvuohta
Luondu ii suodjaluvvo beare luonddu dihte muhto maid olbmo buresbirgejumi ja eallinvejolašvuođaid dorvvasteami dihte. Suodjalanguovlluid vuođđudanmearrádusain leat váldon vuhtii báikkálaš olbmuid árbevirolaš vuoigatvuođat earret eará boazodollui, meahccebivdui, guolásteapmái, čoaggimii ja kultuvrra gáhttemii. Go luonddusuodjalan-, meahcce-, vánddardan- ja eará sierraguovlluide ráhkaduvvojit dikšun- ja geavahanplánat, de báikkálaš ássiid ja eará čanusjoavkkuid dárbbut ja sávaldagat váldojuvvojit vuhtii.
Bálvalusat luonddus lihkadeaddjái
Davvi-Sámi luondu fállá fiinna birrasa vánddardeaddjái. Luonddus vánddardeami veahkehit luonddubálvalusaid bajásdoallan ráhkadusat ja bálvalusat: dihkkáduvvon bálgát, fuolahuvvon dollasajit, stobut ja oahpástagat. Luonddubálvalusaid ovddasvástádussan leat Meahciráđđehusa áššehasbálvalanbáikkit, main oažžu dárbbašlaš lobiid, gárttaid ja rávvagiid meahccereaissuide. Vásáhusat ja diehtu luonddus gávdnojit maid Davvi-Sámi luondduguovddážiid, -stobuid ja -dáluid čájáhusain, publikašuvnnain ja oahpistandávvaliin. Lassidiehtu gávdno luontoon.fi -fierbmebálvalusas.