Ohcejogas ávvudedje 15-jahkásaš luonddustobu
Almmustahtton 23.6.2010
Ohcejoga luonddustohpu rahppojuvvui dán gease 15. geardde, nuba dál lei sivva ávvuđit.
Luonddustobus fitne sullii 150 guossi ja stohpu lei máŋga diimma bahkka dievva.
Meahciráđđehusa luonddustohpu rahppojuvvui jagi 1996 ja odne ávvudedje 15. geasi.
veaigin doppe lei gáffeguossoheapmi ja luonddustobus ledje máŋggat Meahciráđđehusa bargit, gieddebargiin gitta hoavdadássái, muitaleamen bargguset ja Meahciráđđehusa birra.
Dilálašvuođas almmustahttojuvvui ođđa multivišuvdna (govvačájáhus) Ohcejoga eallimis. Meahciráđđehusa spesiálaplánejeaddji Pasi Nivasalo lea plánen dasa govaid ja musihkas vástida ohcejohkalaš musihkkameašttir Niilo Rasmus.
Ohcejoga gielddastivra sátnejođiheaddji Veikko Guttorm muitalii dilálašvuođa álggus, ahte Meahciráđđehus lea mearkkašahtti ovttasbargoguoibmi Ohcejoga gildii.
- Ovttasbargu lea leamašan miehtemielalaš. Gielda lea ožžon Meahciráđđehusa bokte resurssaid guovllu ovddideapmái. Meahciráđđehus lea ráhkadan giliid lahkasiidda lagašbálgáid ja turisttain lea beroštupmi daidda. Olbmot bohtet deike oaidnit luonddu ja dalle fuolahuvvon bálgát leat dehálaš rollas, Guttorm muitala.
Ávvudilálašvuođas fitne báikkálaččaid lassin maiddái luopmoreaisui boahtán mátkkálaččat ja veaigebeaivi golai somás searvvis. Guossit besse gáhkkokáfestallama ja govvačájáhusa geahččama olis háleštit oahpes ja amas olbmuiguin sihke Meahciráđđehusa bargiiguin. Ávvubeaivvi loahpas álbmotmeahccehoavda Pirjo Seurujärvi fertii doapmalit gávpái viežžat lasi gáhkuid. Son beasai movttegit gávnnahit, ahte báikki ala bohte eambo olbmot go maid son lei vuordán.
Luonddustobu šiljus njuolga vánddardanbálgái
Luonddustobus lea bissovaš čájáhus Deanu luosas ja dan bivddus sihke guovllu luonddus ja historjjás. Meahciráđđehusa luonddustohpui oahpásmuvvan lea nuvttá. Luonddustobu šiljus beassá njuolga Ohcejoga 35 kilomehtera vánddardanmáđiijai. Guossit ožžot luonddustobus rávvema ja doppe sáhttá oastit girjjiid ja kárttaid sihke Meahciráđđehusa lustaguollebivdolobiid. Luonddustobu oktavuođas doaibmá maiddái Ohcejoga gieldda turismarávven. Luonddustobus fitnet geasi áigge sulaid 4000 guossi. Luonddustohpu rahppojuvvui 10. beaivve geassemánus ja dat lea rabas beaivválaččat gitta čakčamánu loahpa beallái. Dán geasi luonddustobus leat golbma bargi. Bargiin lea nana sámekultuvrra dovdamuš ja sámegiela dáidu, guovttis stuđereba sámekultuvrra Oulu universiteahta Giellagas-instituhtas.
Lassidieđut:
Ohcejoga luonddustohpu (www.lundui.fi)