Dálvegeaidnu lea birasustitlaš muorrafievrredanvuohki
Almmustahtton 2.2.2010
Meahciráđđehusa dálveáigge muorrafievrredemiin ávkkástallet viidásit dálvegeainnuid. Dálvegeainnuid ovdamunni lea hálbbit ráhkadangolut ja birasustitlašvuohta. Davvi-Sámis dálvegeainnuid geavahit 3-4 mánu, juobe juovlamánu beallemuttus gitta nu guhkás go giđa siivvut addet vejolašvuođa.
Anára vuovdedoalloguovllu doaibma lea čohkkejuvvon dálvegeainnuid várrii ja buot dálvvi vuovdebargoguovllut leat dálvegeainnuid guoras. Dálvegeainnuin barggut joatkašuvvet cuoŋománu beallemuddui, goas beaivváš dipmadišgoahtá geainnuid. Beassážiid maŋŋá vuovdebargit báhcet lupmui. Buohkanassii Anára gielddas leat dálvegeainnut logiid kilomehteriid.
Dálvegeainnu huksenávdnasat leat muohta ja buolaš. Dálvegeainnu báikki figget geahččat juo čakčat. Álggos geaidnovuođu dulbmet mohtorgielkkáiguin. Geaidnovuođu jieŋodettiin njeidet muoraid geaidnolinnjás, stuorámus geđggiid sirdet eret ja dássejit vearrámus bovnnaid billáriin dahje goaivunmáseniin. Ádjagiid badjel ráhkadit gaskaboddasaš šalddiid.
- Geahččalit ráhkadit dálvegeainnuid jekkiid ala ja minerálaeatnamiid mielde johtit nu unnán go vejolaš, dušše bákku ovddas, Meahciráđđehusa plánejeaddji Pauli Tuovinen muitala.
Dálvegeainnu luottat jávket luonddus viehka johtilit ja jekkiid ala báhcet unnán luottat. Dálvegeainnuid geavaheapmi geahpeda geasi áigge meahccegeainnuid ráhkadeami dárbbu. Dálvegeainnuid mielde beassá maiddái váttis báikkiide, dego jekkiid duohkái, gosa geasi áigge meahccegeainnu livččii váttis ja juobe veadjemeahttun ráhkadit.
- Dálvegeainnu ráhkadeami golut leat olu unnibut go geasi áigge meahccegeainnu. Maŋit jagi dat lea vel hálbbit, go lea juo gárvves geaidnovuođđu. Boares dálvegeaidnovuođuid geahččalit ávkkástallat ođđa čuollanguovlluid plánedettiin, vuovdedoallohoavda Pertti Heikkuri čilge.
Mohtorgielkámáđijaid ráhkadeami oktavuođas maiddái ávkkástallet boares dálvegeaidnovuođuid. Báikkálaččat ávkkástallet maiddái boares dálvegeainnuid. Mohtorgielkávuoddjit ja badjealbmát vudjet milloseappot dássidis máđidja mielde.
Davvi-Sámi muorain váldooassi njeidojuvvo mohtorsaháin. Anára gielddas leat sullii 40 vuovdebargi. Máŋggadoaibmamášena oassi vuovdečuollamiin lea dušše logemat proseantta.
Lassidieđut:
Plánejeaddji Tapani Pennanen, Meahciráđđehus, Avvil, tel. 0400 346 315
Plánejeaddji Pauli Tuovinen, Meahciráđđehus, Avvil, tel. 0400 157 648